AQSH terma jamoasi bosh murabbiyi Maurisio Pochettino «PSJ»da Messi, Neymar va Mbappe bilan birga ishlagan davridan olgan taassurotlari bilan o‘rtoqlashdi.
«Menimcha, aynan «PSJ»dagi faoliyatimdan keyin men to‘laqonli murabbiyga aylandim. Hatto tarkibingizda juda kuchli futbolchilar bo‘lgan taqdirda ham, Parijga kelganingizda o‘z xarakteringizga ega bo‘lishingiz bilan birga, jamoadagi o‘yinchilarga moslashishingiz ham kerak bo‘ladi. Bu aslo g‘azabni keltirmaydi, aksincha, ixtiyoringizda o‘ziga xos xususiyatlarga ega futbolchi borligini va undan foydalanish mumkinligini bilasiz.
Shunday bo‘lsa-da, siz o‘z g‘oyalaringizni qayta ko‘rib chiqishingiz va yigitlarning rivojlanishiga imkon beradigan ma’lum bir tuzilmani yaratishga harakat qilishingiz lozim», — dedi Pochettino Garri Nevillning Stick to Football podkastida.
Argentinalik mutaxassis «PSJ»da 2021 yilning yanvaridan 2022 yilning iyuliga qadar faoliyat yuritgan. Uning qo‘l ostida parijliklar Fransiya chempioni, mamlakat Kubogi va Superkubogi sohibiga aylanishgan.
