«Ан-Наср»нинг юлдуз ҳужумчиси Криштиану Роналду мавсум якунида муҳим баёнот беришга ваъда берди.
«Мавсум охирида кўплаб муҳим масалалар бўйича ўз фикримни билдираман», — дея Роналдунинг сўзларини келтирди журналист Фабрицио Романо Рио Фердинандга таянган ҳолда.
Шунингдек, Роналду Европа юлдузлари учун Саудия лигасига йўл очиб берган илк футболчилардан бири бўлганини таъкидлади.
«Бу лигага келган биринчи футболчи мен бўлдим. Қолганлар менинг орқамдан бу ерга келишди», — деди 41 ёшли футболчи.
Криштиану Роналду 2023 йил бошидан буён «Ан-Наср» шарафини ҳимоя қилиб келмоқда. Унинг амалдаги шартномаси 2026/2027 йилги мавсум якунига қадар мўлжалланган.
Эҳтимол, мавсум тугагач, Роналду нима учун яқинда бир қатор ўйинларни ўтказиб юборганига ойдинлик киритар. Матбуотда ҳужумчи клуб бошқарувидан норози бўлгани учун ўйинларни бойкот қилгани ҳақида хабарлар тарқалган эди.
