Германиялик ҳужумчи Ник Вольтемаде «Ньюкасл»га ўтганидан бир йил ўтиб, жамоани тарк этиши мумкин. Бу ҳақда таниқли журналист Кристиан Фальк хабар бермоқда.

Манбанинг маълумотига кўра, «қарғалар» 24 ёшли Вольтемадени сотиш вариантини кўриб чиқишмоқда. У ўтган ёзда «Штутгарт»дан 75 миллион евро эвазига сотиб олинган эди. Эслатиб ўтамиз, бу «Ньюкасл» тарихидаги энг қиммат харид ҳисобланади.

Жорий мавсумда Вольтемаде барча мусобақаларда 48 та ўйинда майдонга тушиб, 10 та гол урди ва 5 та голли узатмани амалга оширди. Унинг клуб билан шартномаси 2031 йилгача мўлжалланган. Transfermarkt мутахассислари ҳужумчининг нархини 65 миллион еврога баҳоламоқдалар.