Инсайдер Жанлука Ди Марцио хабарига кўра, «Милан» ёзги трансфер ойнасида «Арсенал» ҳужумчиси Габриэл Жезусни ўз сафига қўшиб олишни режалаштирмоқда.

Манбага кўра, «россонери» бразилиялик футболчини келаси мавсум учун ҳужум чизиғининг етакчиси сифатида кўрмоқда. Айниқса, агар Рафаэл Леау жамоани тарк этса, Жезус асосий фигурага айланиши мумкин.

Ўз навбатида, «Арсенал» ҳам футболчининг кетишига қарши эмас. Лондонликлар таркибда натижа берувчи ёш футболчиларга кўпроқ ишонч билдиришни мақсад қилган, Жезус эса сўнгги мавсумларда муҳим ўйинларда самарадорликни пасайтирган.

Жорий мавсумда у Англия Премьер-лигасида 12 та ўйинда иштирок этиб, атиги 2 та гол урди. Унинг «Арсенал» билан шартномаси 2027 йил ёзигача амал қилади. Transfermarkt маълумотига кўра, футболчининг бозор қиймати 20 миллион еврони ташкил қилади.