Лондоннинг «Арсенал» клуби собиқ ҳужумчиси Иан Райт Виктор Дьёкереш жорий мавсумда ўз вазифасини уддалади деб ҳисоблайди. Швециялик футболчи кам гол ураётганлиги ва «канонирлар»нинг жамоавий ўйинига мос тушмаётганлиги учун тез-тез танқид қилинади, бироқ Райтнинг фикрича, ҳужумчи ундан талаб қилинган натижага эришган.

«Мен кўп йиллар давомида бизга ҳужумчи кераклигини айтганман. Биз уни топдик, энди эса одамлар уни етарлича яхши эмаслигини айтишмоқда. Унинг кўрсаткичлари ҳаммасини айтиб турибди — у 21 та гол урди ва ўз ишини бажарди. У «Фулхэм» дарвозасини икки бор ишғол қилди — айнан шундай ўйинларда у жамоага жуда керак. Илгари «Арсенал»да бундай рақибларга гол урадиган ҳеч ким йўқ эди — бу каби баҳсларда голлар қийинчилик билан қўлга киритиларди. Дьёкереш бу муаммони ҳал қилди», — дея Райтнинг сўзларини келтирмоқда Arsenal Radar нашри.

Эслатиб ўтамиз, Виктор Дьёкереш ўтган ёзда «Спортинг»дан қарийб 67 миллион евро эвазига Лондон гранди сафига келиб қўшилган эди.