«Рома» ва «Фиорентина» жамоалари нафақат майдонда, балки трансфер бозорида ҳам рақобатни давом эттиришлари мумкин.
La Repubblica Firenze нашрининг хабар беришича, Рим клуби флоренцияликлар таркибидаги футболчилар ҳисобига кучайиш имкониятларини кўриб чиқмоқда. Хусусан, «бўрилар»нинг қизиқишлари доирасига ўнг қанот ҳимоячиси Додо тушган.
Бразилиялик футболчининг «Фиорентина» билан шартномаси 2027 йилгача мўлжалланган, бироқ келишувни узайтириш бўйича музокаралар боши берк кўчага кириб қолган. «Бинафшаранглилар» Донецкнинг «Шахтёр» клуби собиқ ўйинчисини келажакда текинга қўйиб юбормаслик учун шу ёздаёқ сотиш вариантини истисно қилишмаяпти.
Шунингдек, «Рома»нинг шорт-листидан Никколо Фортини ҳам ўрин олган бўлиб, клуб унга қишда ҳам қизиқиш билдирган эди. Бироқ футболчининг юқори баҳолангани (тахминан 15 миллион евро) эҳтимолий трансферни қийинлаштириши мумкин.
