«Ливерпуль» ва Англия терма жамоаси собиқ ҳимоячиси Жейми Каррагер «Челси»нинг «Ноттингем Форест»дан учраган мағлубиятига муносабат билдирди. Лондон клуби Англия чемпионатининг 35-турида 1:3 ҳисобида имкониятни бой берди.

«Бу даҳшат. Бугун майдонда 5 ёки 6 нафар ҳақиқий топ-даражадаги футболчилар бор эди, лекин уларни «Б» даражадаги жамоа мағлуб этди. Ваҳоланки, бундан 12 ой олдин улар «ПСЖ»ни тор-мор этишганди. Ҳозир эса футболчилар ва ходимлар, ўйинчилар ва мухлислар ўртасида ҳеч қандай боғлиқлик қолмаган», — дея Каррагернинг сўзларидан иқтибос келтирмоқда Sky Sports.

«Қайсидир маънода бу яхши ҳам, чунки футбол нафақат пул сарфлаш, ўйинчи сотиб олиш ва ходимларни алмаштиришдан иборат эмаслигини кўрсатиб қўйди. Футбол — бу жипсликни яратиш ҳамдир, «Челси»да эса бу нарса йўқ. Ҳозирда улар худди синган футбол клубидек кўринишмоқда».

Ушбу учрашувдан сўнг «Челси» 48 очко билан турнир жадвалида тўққизинчи ўринни эгаллаб турибди.