Испаниянинг Барселона шаҳрида шаҳмат бўйича ўтказилаётган “XV Open Internacional de Sants, Hostafrancs I la Bordeta” халқаро турнирида ҳамюртимиз Антон Филиппов еттинчи турда ҳиндистонлик Б.Адхубанга қарши дона суриб, дуранг натижани қайд этди.

Аввал хабар қилганимиздек, тажрибали гроссмейстеримиз дунёнинг 39 давлатидан келган 310 нафар шахматчи (26 нафари халқаро гроссмейстер) иштирокида ўтаётган мазкур нуфузли мусобақада Испания, Бельгия, Франция, Италия давлати вакилларини мағлуб этиб, фақатгина венесуэлалик Эдуардо Итурризаганинг қаршилигини енга олмаган эди.

Шу кунга қадар бўлиб ўтган етти тур ўйинларининг якунларига кўра 5,5 очко жамғарган Антон Филиппов пешқадамлар сафида бормоқда. Бугун ўтказиладиган 8-турда ҳамюртимиз канадалик Амон Хэмблтонга қарши дона суради.

Халқаро турнирда етти имкониятдан 6 тадан очко жамғарган Эдуардо Итурризага (Венесуэла), Батиста Лазаро Бризон (Куба) ва Владимир Бурмакин (Россия) пешқадамлик қилишмоқда.

Швейцарча тизимда ўтказилаётган мазкур халқаро турнир 10 турдан иборат бўлиб, ғолиб ва совриндорлар 1 – сентябрь куни маълум бўлади.