«Барселона» ҳужумчиси Роберт Левандовски мавсум якунланганидан кейин клубни тарк этадиган кўринади. Томонлар келаётган ёзда муддати тугайдиган шартномани узайтириш шартлари бўйича келиша олишмаяпти.
Инсайдер Николо Скиранинг маълумотларига кўра, «кўк-анорранглилар»нинг 37 ёшли форвард билан ҳамкорликни давом эттириш имкониятлари тез суръатлар билан камайиб бормоқда. Воқеалар ривожи польяк футболчисининг эркин агентга айланишига қараб кетмоқда.
Роберт Левандовски 2022 йилда «Бавария»дан «Барселона»га ўтган эди. Сўнгги ойларда футболчига «Ювентус», «Милан» ва «Чикаго Файр» клублари томонидан жиддий қизиқиш бўлаётгани ҳақида хабарлар тарқалди. Миш-мишларга кўра, каталонияликлар юлдузли фахрийга маоши сезиларли даражада камайтирилган янги бир йиллик келишув таклиф қилмоқдалар.
