Миланнинг «Интер» клуби марказий ҳимоячиси Алессандро Бастони «Барселона» трансфер бўйича музокараларни бошлашини кутмоқда. Футболчи «кўк-анорранглилар» билан беш йиллик шартномани келишиб бўлган, бироқ ўшандан бери жараёнда силжиш кузатилмаяпти.
Журналист Ферран Мартинеснинг хабар беришича, италиялик ҳимоячи аввалроқ Каталония клубига кутишга тайёрлигини маълум қилган эди, аммо унинг фикрича, бу иш ҳаддан ташқари чўзилиб кетди. «Барселона» Ла Лига чемпионлигини деярли нақд қилиб қўйган ва эътиборини келаси мавсум ишларига қаратиши мумкин бўлса-да, ҳалигача «Интер»га расмий таклиф билан чиққани йўқ.
Манбанинг таъкидлашича, ушбу кечикишнинг сабаби бор: Ханс-Дитер Флик бошчилигидаги мураббийлар штаби чап марказий ҳимоя чизиғида тезкор футболчини кўришни истамоқда, Бастони эса энг юқори тезликка эга ҳимоячилардан эмас. Клуб бошқа вариантларни ҳам кўриб чиқмоқда. Якуний қарорни Фликнинг ўзи қабул қилади — у ҳозирча бир тўхтамга келгани йўқ.
