Мадриднинг «Реал» клуби чап қанот ҳимоячиси Альваро Каррерас сўнгги кунларда матбуотда ўзи ҳақида тарқалган хабарларга муносабат билдирди. Оммавий ахборот воситалари испаниялик футболчининг жамоадаги муаммолари, шунингдек, машғулот пайтида жамоадоши Антонио Рюдигер билан муштлашиб қолгани ҳақида ёзган эди.
«Сўнгги кунларда ўзим ҳақимда ҳақиқатга тўғри келмайдиган турли хабарларни кўрдим. Клубга ва мен билан ишлаётган мураббийларга бўлган садоқатим доимо яхши бўлган ва бугунги кунгача ҳеч нарса ўзгаргани йўқ. «Реал»га қайтган вақтимдан бери доим бор кучим билан ҳаракат қилдим ва орзуларимни амалга ошириш йўлида тинимсиз меҳнат қилдим.
Жамоадошим билан боғлиқ ҳодисага тўхталадиган бўлсам, бу шунчаки бир марталик ҳолат эди. Ҳеч қандай жиддий нарса содир бўлгани йўқ, вазият ҳал этилган. Барча жамоадошларим билан муносабатларим яхши», — деб ёзди Каррерас ижтимоий тармоқлардаги саҳифасида.
Эслатиб ўтамиз, 23 ёшли латераль ўтган йилнинг июль ойида «Бенфика»дан трансфер қилиниб, «қаймоқранглилар» сафига келиб қўшилган эди.
