Madridning «Real» klubi chap qanot himoyachisi Alvaro Karreras so‘nggi kunlarda matbuotda o‘zi haqida tarqalgan xabarlarga munosabat bildirdi. Ommaviy axborot vositalari ispaniyalik futbolchining jamoadagi muammolari, shuningdek, mashg‘ulot paytida jamoadoshi Antonio Ryudiger bilan mushtlashib qolgani haqida yozgan edi.

«So‘nggi kunlarda o‘zim haqimda haqiqatga to‘g‘ri kelmaydigan turli xabarlarni ko‘rdim. Klubga va men bilan ishlayotgan murabbiylarga bo‘lgan sadoqatim doimo yaxshi bo‘lgan va bugungi kungacha hech narsa o‘zgargani yo‘q. «Real»ga qaytgan vaqtimdan beri doim bor kuchim bilan harakat qildim va orzularimni amalga oshirish yo‘lida tinimsiz mehnat qildim.

Jamoadoshim bilan bog‘liq hodisaga to‘xtaladigan bo‘lsam, bu shunchaki bir martalik holat edi. Hech qanday jiddiy narsa sodir bo‘lgani yo‘q, vaziyat hal etilgan. Barcha jamoadoshlarim bilan munosabatlarim yaxshi», — deb yozdi Karreras ijtimoiy tarmoqlardagi sahifasida.

Eslatib o‘tamiz, 23 yoshli lateral o‘tgan yilning iyul oyida «Benfika»dan transfer qilinib, «qaymoqranglilar» safiga kelib qo‘shilgan edi.