Ҳужумчи Ансу Фати катта эҳтимол билан фаолиятини «Монако»да давом эттиради. Инсайдер Фабрицио Романонинг маълумотларига кўра, монегасклар ҳужумчини 11 миллион евро эвазига сотиб олиш вариантини фаоллаштиришга қарор қилишган.

Шу билан бирга, Каталония клуби футболчининг кейинги сотувидан маълум фоиз улушини ўзида сақлаб қолади.

Ансу Фати «Барселона» тарбияланувчиси ҳисобланади. У жорий мавсум якунига қадар «Монако»га ижарага берилган эди. Ҳужумчининг «кўк-анорранглилар» билан амалдаги шартномаси 2028 йилнинг 30 июнигача мўлжалланган.

Жорий мавсумда ҳужумчи «Монако» сафида барча турнирларда 28 та ўйинда майдонга тушиб, 11 та гол уришга муваффақ бўлди. Transfermarkt портали Фатининг қийматини 15 миллион еврога баҳоламоқда.