«Барселона» ярим ҳимоячиси Гави клубнинг собиқ юлдузи Лионель Месси ҳақидаги фикрлари билан ўртоқлашди. Аргентиналик юлдуз «кўк-анорранглилар» сафини 2021 йилда тарк этган эди. Гави эса саккиз карра «Олтин тўп» соҳиби кетганидан кўп ўтмай каталонияликларнинг асосий жамоасида дебют қилган.

«Месси — барча даврларнинг энг буюк футболчиси. У ҳам Ла Масиядан етишиб чиққан ва бу ерда ҳамма уни ўз кумири ҳамда ибрат намунаси деб билади. Мен академияда ўйнаб юрган кезларимда, у асосий жамоада порлар эди, биз эса унга ҳавас билан қарардик. Кўпчилик қатори, мен ҳам болалигимда айнан Месси сабабли «Барса» мухлисига айланганман», — дея 21 ёшли хавбекнинг сўзларини келтиради «Managing Barca».