Мадриднинг “Реал” клубида Федерико Вальверде ва Орельен Чуамени ўртасидаги можародан кейинги кескинлик тобора кучаймоқда.

Манба маълумотига кўра, “қаймоқранглилар”нинг бир нечта футболчиси бош мураббий Альваро Арбелоага жамоа ичида янги можароларнинг олдини олиш мақсадида навбатдаги машғулотни бекор қилиш бўйича мурожаат қилган. Бироқ мутахассис бу таклифни рад этган, чунки клуб “Барселона”га қарши бўлажак “эл-класико”га тайёргарликни давом эттирмоқда.

Хабар қилинишича, мадридликлар кийиниш хонасидаги муҳит ҳануз жуда таранглигича қолмоқда. Жамоа ичида бир-бири билан келишмовчиликда бўлган бир нечта гуруҳ шакллангани айтилмоқда.

Шунингдек, бундай тўқнашувлар аввал ҳам кузатилгани, аммо сўнгги ҳолат энг жиддийси бўлгани таъкидланмоқда. Чунки можародан кейин Вальверде шифохонага олиб кетилган.

“Реал” раҳбарияти ҳар икки футболчига нисбатан ички интизомий иш очган. Испания ОАВ маълумотларига кўра, клуб текширув якунига қадар Вальверде ва Чуаменини вақтинча жамоадан четлатиш вариантини ҳам кўриб чиқмоқда.

Бундай қарор қабул қилинса, ҳар икки ўйинчи ҳам “Барселона”га қарши учрашувни ўтказиб юбориши мумкин.

Шунингдек, айрим футболчилар Арбелоанинг иш услубидан норози экани айтилмоқда. Мураббий билан аввал ҳам келишмовчиликка борган ўйинчилар орасида Дани Себальос номи тилга олинган.