"Челси" бош мураббийи Жозе Моуриньонинг тахмин қилишича, УЕФА доимо унга қарши чиқиб келган. Унинг фикрича, швециялик рефери Юнас Эрикссон "Бавария"га қарши Европа Суперкубогининг 85-дақиқасида Рамиресни майдондан четлатиб, ўйинни "ўлдирган". Лекин Моуриньо бундай адолатсизликка қарши кўника олмаслигини  таъкидлади.

"Менинг УЕФА билан қарама-қаршилигим жуда-жуда олисга бориб тақалади. УЕФА тасарруфи остидаги мусобақаларда 10 киши бўлиб ўйнаш бўйича менда фантастик тажриба бор. Шунинг учун бундай фикрга келиш учун ҳуқуқим бор. Мен футболчиларга жуда ва жуда чарчаган пайтда 10 киши бўлиб ўйнаб, ҳужум қилишни ҳам ўргатишим мумкин. Учрашув сўнгида ўйинчилар бутунлай ҳолдан тойганди, улар борларини бериб бўлишганди. Ўн киши бўлиб ўйнаш тажрибаси бизга қўл келди".

"Четлатиш? Футбол ичида юрган кишилар битта қоидани яхши билишади: футбол эҳтиросини. Агар сен футболни севсанг, бунга ўхшаш ҳолатлар учун ўйинни "ўлдирмайсан". Сен финални "ўлдирмайсан". Менинг олдимда юз берган ҳолатда Данте ўзининг биринчи сариқ карточкасини олиш керак эди, аммо бу нарса рўй бермади", дейди Моуриньо.

"Агар яхши инглиз ҳаками бўлганида у Рамиресга айтган бўларди: "Менга қара, ҳеч кимга жароҳат етказма, бундай ҳолатни бошқа такрорлама". Ёки "Бавария" футболчиларига айтган бўларди: "Ётиб олманглар. Бундай тарзда провокация қилманглар. Ҳалол ўйнанглар". Агар қоидаларга қатъий бўйсунадиган бўлсак, ҳа, бу иккинчи сариқ карточка. Лекин ҳар сафар бундай қилиш шартмас. Лекин бу мен учун янгилик эмас", дейди "Челси" бош мураббийи.

"Мен "Барса"га қарши икки ёки уч марта ўн киши бўлиб ўйнаганман. Мен "Интер"да ишлаганимда, Чемпионлар лигасининг ярим финалида деярли бир соат давомида "Барселона"га қарши 10 киши бўлиб ўйнаганмиз. "Реал"га ўтганимдан кейин ҳам Чемпионлар лигасининг ярим финалида ўн киши бўлиб ўйнадик. Ҳозир эса мен "Челси"га қайтдим ва Суперкубок финалида яна ўн киши бўлиб ўйнадик. Воқеаларни таҳлил қилинг ва хулоса қилинг. Шунчаки менинг омадим келмаяпти", Моуриньонинг сўзларидан иқтибос келтирмоқда The Guardian.