«Барселона» бош мураббийи Ханси Флик Мадриднинг «Реал» клуби ярим ҳимоячилари Федерико Вальверде ва Орельен Тчуамени ўртасида содир бўлган низо ҳақидаги фикрлари билан ўртоқлашди.
Аввалроқ, «қироллик клуби»нинг пайшанба кунги машғулоти пайтида футболчилар ўзаро муштлашиб кетгани ва оқибатда уругвайлик Вальверде бош суяги ва мия жароҳати олгани хабар қилинганди. Мадрид клуби ҳар икки футболчини 500 минг евро миқдорида жаримага тортди.
«Бундай зиддиятлар ҳар ерда учраб туради, бу фақат «Реал»га хос воқеа эмас. Албатта, бу бироз ҳайратланарли бўлди, лекин бу менинг жамоам эмас ва бу ҳақда бош қотиришимга ҳожат йўқ. Низоларни қандай бошқариш керак? Мен «Барселона»да қадрлайдиган энг муҳим жиҳат — ҳаммамиз бир йўлдан кетаётганимиздир. Футболда ҳам, ҳаётда ҳам бундай ҳолатлар бўлиб туради. Буни нормал ҳолат дея олмайман, лекин юз бериши мумкин. Энг яхши йўли — аввал вазиятни муҳокама қилиш ва кейин ечим излашдир», — дея Фликнинг сўзларини келтирмоқда Sport.es.
