Жаҳон чемпионати бошланишига роппа-роса бир ой қолди. Аргентина терма жамоаси душанба куни ФИФАга тақдим этилган дастлабки таркибни эълон қилди. Ушбу кенгайтирилган рўйхатдан 55 нафар футболчи ўрин олган.
Энг муҳим жиҳат шундаки, Лионель Месси ушбу қайдномага киритилган. Аввалроқ матбуотда Мессининг Жаҳон чемпионатида иштирок этиш борасида ҳали бир қарорга келмагани ҳақида миш-мишлар тарқалган эди. Юлдуз ҳужумчи мусобақага жисмоний жиҳатдан 100 фоиз тайёр эканлигига ишонч ҳосил қилмоқчи эканлиги айтилганди.
Жаҳон чемпионатининг гуруҳ босқичида Аргентина Жазоир, Австрия ва Иордания терма жамоаларига қарши баҳс олиб боради. «Альбиселесте» АҚШ, Канада ва Мексика мезбонлик қиладиган турнирда Жаҳон кубогини ҳимоя қилади.
