Январь ойида дарвозабон Марк-Андре тер Штеген «Барселона»дан «Жирона»га ижара асосида ўтган эди. Немис посбони бир нечта ўйин ўтказгач, жароҳат олди ва шундан бери майдонга тушмаяпти.
The Athletic нашрининг хабарига кўра, «Барселона» бош мураббийи Ханс-Дитер Флик тер Штеген келаси мавсум учун унинг режаларига кирмаслигини аниқ билдирган. Эндиликда тажрибали дарвозабон ўз келажаги ҳақида жиддий бош қотиришига тўғри келади.
Марк-Андре тер Штегеннинг каталонияликлар билан шартномаси 2028 йилнинг ўрталаригача мўлжалланган. Transfermarkt портали 34 ёшли посбонни ҳозирда 4 миллион еврога баҳоламоқда.
Эслатиб ўтамиз, Флик қўл остидаги «Барселона» яқинда қаторасига иккинчи бор Испания чемпиони бўлди.
