«Наполи» бош мураббийи Антонио Конте кейинги мавсумда ҳам клубда қолиш фикрига яқин турибди. Бу ҳақда Football Italia нашри хабар бермоқда.
Аввалроқ неаполликлар италиялик мутахассисни олиб қолишга ҳаракат қилаётгани ҳақида маълумотлар тарқалган эди. Манбанинг таъкидлашича, раҳбарият билан муносабатлари совуқлашганига қарамай, Конте жамоада қолишга рози бўлиши мумкин. Бироқ кўп нарса Конте ва «Наполи» президенти Аурелио Де Лаурентис ўртасидаги шахсий учрашувдан сўнг ойдинлашади.
«Наполи» — Италиянинг амалдаги чемпиони. Бу мавсумда «адзурри»лар чемпионлик унвонини ҳимоя қила олмасликлари аниқ бўлиб улгурган, аммо кумуш медалларни қўлга киритишлари мумкин. Мавсум якунини икки тур қолганида Конте шогирдлари 70 очко билан иккинчи ўринда боришмоқда.
