«Манчестер Сити» бош мураббийи Хосеп Гвардиола ҳужумчи Антуан Семеньо ҳақида ўз фикрларини билдирди. Шанба куни ганалик футболчи «Уэмбли»да ягона голга муаллифлик қилиб, «Челси»га қарши Англия Кубоги финал учрашуви қаҳрамонларидан бирига айланди. Форвард 71-дақиқада рақиб дарвозасини ишғол этиб, «шаҳарликлар»га минимал ҳисобдаги ғалабани тақдим этди.

«Антуан буни Ираола қўл остида, «Борнмут»да ҳам уддаларди, унда гол сезиш қобилияти жуда кучли. У учта позицияда ўйнашга қодир. Менинг фикримча, у ҳужумда жуда фойдали: ўтган ўйинда Фоденнинг узатмасидан кейин қандай гол урганини эсланг. Ажойиб якун. Бугун ҳам у жуда чиройли гол урди. Семеньо, худди Гехи каби, қишда жамоага келиши билан дарҳол улкан фойда келтира бошлади», — дея Гвардиоланинг журналистлар билан суҳбатдаги сўзларини келтиради матбуот хизмати.

Антуан Семеньо «Сити» сафида 25 та учрашувда майдонга тушиб, 10 та гол ва 3 та голли узатмани ўз ҳисобига ёздириб қўйди.