«Манчестер Юнайтед»нинг собиқ сардори Гари Невилл «Ноттингем Форест»га қарши ўйинда ҳакамлар чиқарган қарорни кескин танқид қилди. Ҳужум вақтида тўп қўлга текканига қарамай, Матеус Куньянинг голи инобатга олинди. Баҳсли вазият АПЛ 37-туридан ўрин олган учрашувнинг (3:2) иккинчи бўлимида содир бўлди. Брайан Мбеумонинг йўллаган зарбаси тўсиб қолингач, тўп унинг қўлига тегди ва сўнгра Куньяга бориб тушди, у эса тўпни дарвозага жойлаб қўйди.

Бош ҳакам Майкл Солсбери аввалига голни ҳисоблади, кейин эса такрорий видеолавҳани кўриб чиқиб, қўл билан тегинишни тасодифий деб баҳолади ва ўз қарорини ўзгартирмади.

«Гол ҳисобландими? Худойим-ей. Бу ҳар томонлама мутлақо даҳшатли қарор. Тўғриси, бу шунчаки кулгили», — деди Гари Невилл Sky Sports эфирида.

— «VAR ҳакамга у ерда қўл билан ўйналганини ва тўп айнан шу сабабли ҳужумдаги футболчига борганини аниқ кўрсатиб берди. У эса монитор ёнига бориб, барибир VAR фикрини рад этди. Ҳозиргина кўрган нарсамга ишона олмаяпман».

IFAB қоидаларига кўра, агар футболчи тўп қўлига текканидан сўнг дарҳол гол урса, ҳатто бу қасддан қилинмаган бўлса ҳам, гол бекор қилиниши керак. Бироқ ушбу вазиятда гол муаллифи Брайан Мбеумо эмас, балки Матеус Кунья бўлди, бу эса ҳакамларга вазиятни бошқача талқин қилиш имконини берди.

Бу қарор ҳам мухлислар, ҳам экспертлар ўртасида шиддатли муҳокамаларга сабаб бўлди. Невиллнинг ўзи эса юз берган воқеани жорий мавсумда VAR иштирокидаги энг ғалати вазиятлардан бири деб атади.