Ламин Ямал мушак жароҳатидан сўнг тикланиш жараёнини давом эттирмоқда. Испания Қироллик футбол федерацияси вакиллари «Барселона» клуби ва футболчининг ўзи билан алоқада бўлиб, унинг ҳолатини диққат билан кузатиб боришмоқда.
Душанба куни The Athletic нашри саҳифаларида Ямалнинг айни дамдаги вазиятига бағишланган янги материал чоп этилди. Унда айтилишича, 18 ёшли футболчи Испания терма жамоасининг Жаҳон чемпионатидаги Кабо-Вердега қарши илк учрашувини катта эҳтимол билан ўтказиб юборади. Ушбу баҳс 15 июнь куни бўлиб ўтади.
Саудия Арабистонига қарши кечадиган иккинчи ўйинга (19 июнь) келсак, Ямалнинг майдонга тушиши ҳали ҳам сўроқ остида турибди. Аввалроқ матбуотда Ламин Ямал фақатгина Испаниянинг мундиалдаги учинчи — Уругвайга қарши учрашувига (27 июнь) тайёр бўлиши мумкинлиги ҳақида ёзишган эди.
