Lamin Yamal mushak jarohatidan so‘ng tiklanish jarayonini davom ettirmoqda. Ispaniya Qirollik futbol federasiyasi vakillari «Barselona» klubi va futbolchining o‘zi bilan aloqada bo‘lib, uning holatini diqqat bilan kuzatib borishmoqda.
Dushanba kuni The Athletic nashri sahifalarida Yamalning ayni damdagi vaziyatiga bag‘ishlangan yangi material chop etildi. Unda aytilishicha, 18 yoshli futbolchi Ispaniya terma jamoasining Jahon chempionatidagi Kabo-Verdega qarshi ilk uchrashuvini katta ehtimol bilan o‘tkazib yuboradi. Ushbu bahs 15 iyun kuni bo‘lib o‘tadi.
Saudiya Arabistoniga qarshi kechadigan ikkinchi o‘yinga (19 iyun) kelsak, Yamalning maydonga tushishi hali ham so‘roq ostida turibdi. Avvalroq matbuotda Lamin Yamal faqatgina Ispaniyaning mundialdagi uchinchi — Urugvayga qarshi uchrashuviga (27 iyun) tayyor bo‘lishi mumkinligi haqida yozishgan edi.
