«Реал» вингери Винисиус Жуниор клубни тарк этаётган Даниэль Карвахалга мурожаат йўллади. Бугун мадридликлар 34 ёшли ҳимоячи мавсум якунида жамоадан кетишини эълон қилишди.
«Тарихдаги энг яхши ўнг қанот ҳимоячиси ва ҳақиқий афсона. Бизга ғалаба сари йўлни кўрсатган ва мадридчи (мадридиста) бўлиш нима эканлигини ҳис қилишимизга ёрдам берган сардор.
Кўп йиллар давомида биз битта кийиниш хонасини, майдондаги курашларни, совринларни ва мен ҳеч қачон унутмайдиган лаҳзаларни баҳам кўрдик. Биз биргаликда Чемпионлар Лигаси, Ла Лига, клублар ўртасидаги жаҳон чемпионатида зафар қучдик ва ўзимиз жуда яхши кўрадиган ушбу либосда тарихий учрашувларни ўтказдик.
Ҳаммаси учун раҳмат сенга. Сендан ўрганиш ва шунча лаҳзаларни бирга баҳам кўриш мен учун шараф бўлди, акам. Сенинг исминг «Реал» тарихига бир умрга муҳрланиб бўлган», – деб ёзди Винисиус.
