Пеп Гвардиола «Манчестер Сити» бош мураббийлиги лавозимига Энцо Мареска номзодини маъқуллади.
Аввалроқ, «Челси»да фаолият юритган италиялик мутахассис «Сити»да Пепнинг ўрнини эгаллаши ва клуб билан уч йиллик шартнома имзолаши маълум бўлган эди.
talkSPORT нашри тарқатган маълумотларга кўра, ўз вақтида Йохан Кройффдан сабоқ олган ва унинг мураббийлик фалсафасини ривожлантирган Пеп Манчестер клубида ўзидан кейин қоладиган меросини сақлаб қолишдан манфаатдор. Шу сабабли ҳам у илгари ўз мураббийлар штабида фаолият юритган Маресканинг тайинланишини қўллаб-қувватлади. Гвардиола ҳатто янги мураббий борасидаги қарорни қабул қилиш жараёнида клуб спорт директори Угу Виана билан биргаликда бевосита иштирок этган.
