«Наполи» бош мураббийи Антонио Конте мавсум якунидан сўнг ўз лавозимини тарк этади.

Инсайдер Фабрицио Романонинг берган маълумотларига кўра, 56 ёшли италиялик мутахассис бундай қарорга келиб бўлган ва бу ҳақда клуб президенти Аурелио Де Лаурентисни бундан бир ой олдин хабардор қилган. Шартнома 2027 йилнинг ёзига қадар амал қилишига қарамай, Конте клубга ҳеч қандай компенсация тўламайди ва клуб ҳам унга ҳеч қандай кетиш нафақаси (товон пули) бермайди. Антонио келгуси иш жойи бўйича ҳеч қайси клуб билан келишувга эришмасдан туриб «Наполи»дан кетмоқда.

Неаполликлар А Сериянинг сўнгги тури олдидан турнир жадвалида иккинчи ўринни эгаллаб туришибди ва 2026/27 йилги мавсум учун Чемпионлар Лигаси йўлланмасини аллақачон нақд қилиб қўйишган.

Конте «Наполи»да 2024 йилдан буён ишлаб келаётган эди ва клуб билан биргаликда Италия чемпионати ҳамда Супекубогида ғолиб чиқди.

Аввалроқ, «Наполи» бош мураббийлигига энг асосий номзод сифатида Маурицио Сарри кўрилаётгани ҳақида хабар берилган эди.