«Барселона» футболчиси Эрик Гарсия Ханс-Дитер Фликнинг каталонияликлар мураббийлик постидаги фаолиятига баҳо берди. У германиялик мутахассис футболчилар учун худди отадек бўлиб қолганини маълум қилди.
Гарсия Фликнинг ҳалоллиги ва ростгўйлигини алоҳида таъкидлаб ўтди. Мураббий ўз туйғуларини яширмайди ва футболчиларга ҳамма гапни рўй-рост айтади.
«Бу гап аввал ҳам айтилган, аммо бу ҳақиқат: Флик биз учун худди отадек. Яхши кунда ҳам, ёмон кунда ҳам у ҳамиша содиқ ва ҳалол. Агар у сизга бақириши керак бўлса, буни юзингизга тик қараб амалга оширади ва вазиятни борича айтади — бу сизга ёқадими ёки йўқми, фарқи йўқ. Жамоада бу жуда муҳим омил ва у бундай вазиятларни жуда яхши бошқара олади», — деди Гарсия.
Эслатиб ўтамиз, яқиндагина Флик «Барселона» билан шартномасини узайтирди. Янги келишув 2028 йилнинг ёзига қадар мўлжалланган.
