Дарвозабон Мануэль Нойер Евро-2024 мусобақасидан кейин миллий жамоада умуман ўйнамаган бўлса-да, Германия терма жамоасининг ЖЧ-2026 учун қайдномасидан жой олди. Бундестим бош мураббийи Юлиан Нагельсманн ўз қарорига изоҳ берди.
«Менинг устувор вазифам — Жаҳон чемпионатига мамлакатнинг энг кучли уч нафар дарвозабонини олиб бориш. Шу сабабли биз Нойер билан боғланишга ва яна терма жамоада ўйнаш истаги бор-йўқлигини сўрашга қарор қилдик. У билан қачон боғландик? Аниқ санасини эслаб қолмаганман. Аммо март ойидаёқ, тер Штеген жароҳат олганидан сўнг Нойер билан учрашганимни Бауманнга айтган эдик. Биз уни вазиятдан хабардор қилдик, чунки Мануэль — жуда катта ҳурматга лойиқ футболчи. Унинг шартномаси билан боғлиқ вазият ҳам муҳим эди. Биз унинг умуман футбол ўйнашда давом этиш-этмаслигини билмоқчи эдик. У «Бавария» билан шартномасини узайтириш қарорини бироз кеч қабул қилди. Бу биз учун мажбурий шарт эди. Нойернинг ютуқлари сон-саноқсиз, унда ўзига хос аура ва улкан обрў-эътибор бор. Мануэль майдонга тушганида жамоага катта ёрдам беради. Сўнгги вақтларда у ўйнамаган даврлар ҳам бўлди. Бу ҳолат бизда ҳам такрорланиши мумкин, буни инкор этиб бўлмайди — биз бу омилни ҳисобга оламиз. Агар бирор гап бўлса, бизда Бауманн бор, у саралаш босқичидагидек жуда яхши ўйин кўрсата олади», — деди Нагельсманн матбуот анжуманида.
Жаҳон чемпионатининг гуруҳ босқичида Германия терма жамоаси Кюрасао, Кот-д’Ивуар ва Эквадор терма жамоаларига қарши майдонга тушади.
