«Челси» ҳимоячиси Йоррел Хато мамлакат чемпионатининг сўнгги икки ўйини ҳақида ўз фикрларини билдирди. Аввалроқ «кўклар» «Тоттенхэм»ни мағлуб этган эди (2:1), сўнгги турда эса 24 май куни «Сандерленд» билан тўқнаш келишади.

«Биз Кубок финалидан сўнг лигада иккита муҳим ўйинимиз қолганини ва олти очко олишимиз кераклигини билардик. «Тоттенхэм»га қарши биринчи қисмни яхши ўтказдик, энди якшанба куни бизни иккинчи қисм кутмоқда. «Сандерленд» билан ўйин қийин бўлади, лекин турнир жадвалида имкон қадар юқорироққа кўтарилиш учун бу жуда муҳим.

Бизда яхши имкониятлар бор. Нима қилишимиз кераклигини биламиз. Еврокубоклардаги ўрнимизни таъминлаш учун бизга уч очко керак. Якшанба куни у ерга ғалаба қозониш учун борамиз. «Челси» — катта клуб, шунинг учун биз еврокубокларда бўлишимиз шарт», — дея Хатонинг сўзларини келтирмоқда «Челси» расмий сайти.