Ҳужумчи Криштиану Роналду «Ан-Наср» таркибида Саудия Арабистони чемпиони бўлди. 41 ёшли футболчи сўнгги тур доирасида «Дамак»ка қарши кечган ва 4:1 ҳисобидаги ғалаба билан якунланган учрашувда дубль қайд этди. Жорже Жезуш шогирдлари «Ал-Ҳилол» клубини икки очкога ортда қолдирган ҳолда маррани биринчи бўлиб якунлашди.

«Титул тақдирини ҳал қилган дубль. Криштиану Роналду, яна ким ҳам бўларди?» — дейилади Португалия терма жамоасининг расмий аккаунтида қолдирилган постда.

Роналду Саудия Про-лигаси тўпурарлар пойгасида 28 та гол билан учинчи ўринни эгаллади. Эслатиб ўтамиз, юлдузли фахрий футболчи Португалия миллий терма жамоасининг бўлажак Жаҳон чемпионати учун қайдномасидан жой олган.