«Ан-Наср» вингери Кингсли Коман ўзининг ажойиб анъанасини давом эттирди — у яна ўз жамоаси таркибида мамлакат чемпионига айланди. Бу сафар франциялик футболчи Саудия Арабистони лигасидаги муваффақиятни нишонлади.

Чемпионатнинг сўнгги тури доирасида «Дамак»ка қарши кечган баҳсда 29 ёшли футболчи рақиб дарвозасини ишғол этиб, Ар-Риёд клубининг 4:1 ҳисобидаги ғалабасига ўз ҳиссасини қўшди. «Ан-Наср» турнир жадвалида «Ал-Ҳилол»ни икки очкога ортда қолдирган ҳолда биринчи ўрин билан маррага етиб келди.

Шу тариқа, Коман профессионал даражадаги 14 та мавсумида 14-маротаба чемпионлик унвонини қўлга киритди. Бундан аввал у икки мартадан «ПСЖ» ва «Ювентус» таркибида мос равишда Франция ва Италияда зафар қучган, кейин эса «Бавария» билан биргаликда Бундеслиганинг «салат идиши» (бош соврини)ни нақд тўққиз бор боши устида баланд кўтарган эди.