Испания футболининг ўтмишдаги машҳур юлдузи Андрес Иньеста мураббийлик фаолиятини бошламоқда. Нуфузли инсайдер Фабрицио Романо хабар беришича, «Барселона»нинг собиқ ярим ҳимоячиси БААнинг иккинчи дивизионида иштирок этувчи «Галф Юнайтед» клубини бошқаради. Иньеста аллақачон Дубай клуби билан меҳнат шартномасини имзолаб улгурган.
Иньеста футболчилик фаолиятини 2024 йилда якунлаган эди. У «Барселона» тизимида 22 йил бўлиб, шундан 18 йилини «кўк-анорранглилар»нинг асосий жамоасида ўтказган. 2018 йилда Иньеста Япониянинг «Виссел Кобе» клубига ўтди, сўнгра БААнинг «Эмирэйтс» жамоасида ҳам тўп тепди. 11 май куни испаниялик футбол афсонаси 42 ёшни қарши олди.
