Ispaniya futbolining o‘tmishdagi mashhur yulduzi Andres Inyesta murabbiylik faoliyatini boshlamoqda. Nufuzli insayder Fabrisio Romano xabar berishicha, «Barselona»ning sobiq yarim himoyachisi BAAning ikkinchi divizionida ishtirok etuvchi «Galf Yunayted» klubini boshqaradi. Inyesta allaqachon Dubay klubi bilan mehnat shartnomasini imzolab ulgurgan.
Inyesta futbolchilik faoliyatini 2024 yilda yakunlagan edi. U «Barselona» tizimida 22 yil bo‘lib, shundan 18 yilini «ko‘k-anorranglilar»ning asosiy jamoasida o‘tkazgan. 2018 yilda Inyesta Yaponiyaning «Vissel Kobe» klubiga o‘tdi, so‘ngra BAAning «Emireyts» jamoasida ham to‘p tepdi. 11 may kuni ispaniyalik futbol afsonasi 42 yoshni qarshi oldi.
