Испания терма жамоаси мураббийлар штаби ЖЧ-2026 старт олдидан Ламин Ямаль, Нико Уильямс ва Микель Меринонинг ҳолатини текширди.

Манба маълумотига кўра, Испания Қироллик футбол федерациясининг тиббий штаби вакиллари миллий жамоанинг асосий футболчилари тикланиш жараёнини шахсан баҳолаш учун Барселона, Бильбао ва Лондон шаҳарларига ташриф буюрган.

Испания терма жамоаси бош мураббийи Луис де ла Фуэнте учала футболчи ҳам турнир бошидаёқ жамоага ёрдам бера олишига ишонаётганини айтди.

«Тиббий ҳисоботга кўра, уларнинг барчаси биринчи ёки иккинчи ўйинга тайёр бўлади», — деди испанияликлар устози.

Ламин Ямаль 22 апрель куни «Сельта»га қарши учрашувда олган сон мушаги жароҳатидан тикланмоқда. «Барселона» вингери аллақачон майдондаги машғулотларга қайтган ва 15 июнь куни Кабо-Вердега қарши ўйинда иштирок этишни мақсад қилган.

Нико Уильямс эса 10 май куни «Атлетик» сафидаги ўйинда мушак жароҳати олган ва ҳозир қайтиш арафасида. «Арсенал» ярим ҳимоячиси Микель Мерино эса оёқ қисмидаги операциядан кейин тўлиқ тикланиб, яқинда майдонга қайтди.

Эслатиб ўтамиз, Испания терма жамоаси ЖЧ-2026нинг асосий фаворитларидан бири сифатида кўрилмоқда.