Италиянинг «Комо» клуби ўз таркибидаги ҳужумкор ярим ҳимоячи Николас Пасни сақлаб қолишга интилмоқда. Бу ҳақда инсайдер Николо Скира хабар бермоқда.

Манбанинг маълум қилишича, «Комо» 21 ёшли аргентиналик футболчининг Мадриднинг «Реал» клубига қайтиши мумкинлиги ҳақидаги миш-мишларга қарамай, уни камида яна бир мавсум жамоада қолдирмоқчи. Клуб раҳбарияти Чемпионлар лигасига йўлланма қўлга киритилгани Пасни қолишга кўндиришда асосий омил бўлишига умид қилмоқда.

Эслатиб ўтамиз, 2024 йилда «Комо» Пасни «Реал»дан 6 миллион евро эвазига сотиб олган эди. Жорий мавсумда ярим ҳимоячи барча турнирларда 40 та ўйинда майдонга тушиб, 13 та гол урди ва 8 та голли узатмани амалга оширди.

Ҳозирги вақтда Transfermarkt мутахассислари Николас Пасни 65 миллион еврога баҳоламоқдалар.