Афсонавий мураббий Арсен Венгер Микель Артетанинг "Арсенал" бошқарувидаги муваффақиятлари ҳақида ўз фикрлари билан ўртоқлашди. Испаниялик мутахассис "канонирлар"ни 22 йил ичида илк бор Премьер-лига чемпионлигига олиб келди, шунингдек, жамоа 20 йил деганда илк бор Чемпионлар лигаси финалида иштирок этади ва тарихда илк бор ушбу нуфузли еврокубокни қўлга киритиши мумкин.
"Артета яхши иш бажарди, ўйинчиларга интизом ва кучли жамоавий руҳни сингдирди. Клуб раҳбарияти ҳам сабр-тоқат ва тўғри трансфер инвестициялари учун олқишга лойиқ. Клуб мураббийга ишонди ва таркибни кучайтириш учун салмоқли маблағлар сарфлаб, уни қўллаб-қувватлади. Артета ҳеч қачон етакчилик сифатлари етишмовчилигидан қийналмаган – у изчил ва ўзига ишонган мутахассис", – дея Венгернинг сўзларидан иқтибос келтиради "Arsenal Radar".
Эслатиб ўтамиз, "Арсенал"нинг "ПСЖ"га қарши ҳал қилувчи финал учрашуви 30 май куни бўлиб ўтади.
