Аргентина терма жамоаси бош мураббийи Лионель Скалони «Рома» ҳужумчиси Пауло Дибалани нима учун қайдномага киритмагани ҳақида гапириб берди.

«Паулонинг маҳорати ҳақида гапиришга ҳожат йўқ, у — буюк футболчи. У жароҳатдан сўнг ажойиб спорт формасида қайтди. Бироқ вақт ўтиши билан янги ёш футболчилар пайдо бўлади ва улар жамоага ўз ҳиссасини қўша бошлайди. Бизнинг ҳолатимизда унинг позициясида мустаҳкам ўрин эгаллаган ва имкониятга лойиқ йигитлар бор. Дибаланинг сифати шубҳа туғдирмайди, биз уни қадрлаймиз, лекин ҳар доим нафақат бугунги кунга, балки келажакка ҳам қараймиз», — дея Скалонининг сўзларини келтирмоқда DSPORT.

Пауло Дибала 2015 йилдан бери Аргентина терма жамоаси шарафини ҳимоя қилиб келади. У миллий жамоа сафида жами 40 та ўйин ўтказиб, 4 та гол уришга муваффақ бўлган.