Италиялик собиқ ярим ҳимоячи Андреа Пирло Италия футбол раҳбариятининг муваффақиятсизликларга нисбатан етарлича реакция билдирмаётганидан хавотирда. Пирло бу омадсизликлар раҳбариятни чора кўришга ундашини кутганди, аммо бу ҳали ҳам содир бўлмади.
«Зудлик билан ислоҳотлар керак. Биз аллақачон уч марта жаҳон чемпионатидан қуруқ қолдик – ва ҳеч қандай чора кўрилмаяпти. Бу нормал ҳолат эмас, Италия футбол оламидаги ўз обрўсини йўқотмоқда», – дея Пирлонинг сўзларини келтиради derbyderbyderby.it.
Эслатиб ўтамиз, Италия терма жамоаси ўз тарихида тўрт марта жаҳон чемпиони бўлган, бироқ кетма-кет учта Мундиалда иштирок эта олмади. Андреа Пирлонинг ўзи эса футболчилик фаолиятини 2017 йилда якунлаган эди.
