Италия матбуоти хабарига кўра, кеча «Милан»га эмас, «Кристал Пэлас»га ўтишга қарор қилган «Борнмут» бош мураббийи Андони Ираола ўз фикрини ўзгартирди. Энди у Германиянинг «Байер» клуби билан музокаралар олиб бормоқда, деб хабар бермоқда Bild.

Манбанинг таъкидлашича, ҳозирча якуний келишувга эришилмаган бўлса-да, испаниялик мутахассис билан музокаралар якуний босқичда турибди. Леверкузенликлар 43 ёшли мураббий учун кечаётган курашда «Милан» ва «Кристал Пэлас»ни ортда қолдириши мумкин.

Аввалроқ Ираола «Милан» раҳбарияти учун асосий номзод экани, бироқ ўтиш амалга ошмагани хабар қилинганди. Ираола «Кристал Пэлас»ни бошқаришга қарор қилган ва бу ҳақда пайшанба куни эълон қилиниши керак эди, аммо мутахассис сўнгги лаҳзада фикридан қайтган.

Жорий мавсум якунидан сўнг Ираола 2023 йил ёзидан бери бошқариб келаётган «Борнмут» жамоасини тарк этади.