Нидерландияда паспортини ўғирлатиб қўйган «Ланс» ва Саудия Арабистони терма жамоаси ҳимоячиси Сауд Абдулҳамид ҳужжатларини тиклашга муваффақ бўлди ва тез орада миллий жамоа ихтиёрига етиб келади.

«Сауд Абдулҳамид ҳужжатларни олиш билан боғлиқ барча зарур жараёнларни якунлаб, пайшанба куни «яшил бургутлар» қароргоҳига қўшилади», — деб хабар бермоқда Саудия Арабистони футбол федерацияси (SAFF) матбуот хизмати.

Аввалроқ, футболчи Амстердамда паспорти ўғирлангани сабабли терма жамоа йиғинига ўз вақтида етиб кела олмаган эди. Тўйга кетаётган вақтида номаълум шахслар ўйинчининг автомобилини бузиб очиб, шахсий буюмларини ўғирлаб кетишган. Федерация барча масалалар ҳал этилганини ва ҳимоячи пайшанба куни жамоага қўшилишини маълум қилди.

Якунланган мавсумда Абдулҳамид «Ланс» сафида 31 та ўйинда майдонга тушиб, 3 та гол урди ва 8 та голли узатмани амалга оширди.