Мадриднинг «Атлетико» клуби ва Аргентина терма жамоаси форварди Хулиан Альварес ўзининг 38 ёшли ватандоши, Американинг «Интер Майами» клуби ҳужумчиси Лионель Месси ҳақида фикр билдирди.
«Унинг ёшини ҳисобга олсак, бу Лео учун ҳақиқатан ҳам сўнгги жаҳон чемпионати бўлиши мумкинлигини ҳаммамиз яхши тушуниб турибмиз, лекин якуний қарорни у ўзи қабул қилади. Бу, шубҳасиз, ўзгача жаҳон чемпионати бўлади. Бу нафақат биз — унинг жамоадошлари ва Аргентина халқи учун, балки уни кузатиб бораётган барча инсонлар учун ҳам тегишли, чунки у — барча замонларнинг энг буюк футболчиси. Албатта, у бутун дунёга жуда катта таъсир ўтказди», — дея Альвареснинг сўзларини келтиради ФИФА расмий сайти.
