“Анжи” клуби директорлар кенгаши аъзоси, клуб фаолиятида ҳал қилувчи аҳамият касб этган футбол мутахассисларидан бири Герман Ткаченко Россиянинг sports.ru сайти журналисти билан суҳбатлашди ва клуб ҳақида жуда кўп маълумоитлар ва фикрлар билан ўртоқлашди.

Жумладан, интервью давомида у ҳамюртимиз Одил Аҳмедовга Москванинг ЦСКА клуби ҳам қизиқиш билдиргани ҳақида айтиб ўтди.

- ЦСКА футболчиларимиздан фақат Траоре ва Аҳмедов билан қизиққанди, - деди Ткаченко, - лекин бу футболчилар сотилмаслигига аввалдан бир қарорга келгандик.

Шунингдек, мутахассис ушбу футболчилар учун “Краснодар” клуби 35 миллион евро таклиф қилганини, лекин клуб бу таклифни рад қилганини ҳам тан олди.

Эслатиб ўтамиз, “Анжи” ўз ривожланиш босқичида кескин бурилиш ясаб, ҳаражатларни камайтириш йўлига ўтгач, клубни бир нечта футболчилар тарк этган ва Одил Аҳмедов жамоадан кетиш ниятида эмаслиги ҳақида айтганди.