«Зенит», «Арсенал» ва Россия терма жамоасининг собиқ футболчиси Андрей Аршавин Ўзбекистон терма жамоасининг 2026 йилги Жаҳон чемпионатидаги иштирокидан нималар кутаётгани ҳақида гапириб ўтди.

— Ёзда Ўзбекистон терма жамоасидан нима кутяпсиз? Жаҳон чемпионатига чиқишнинг ўзи улар учун муваффақиятми ёки гуруҳдан ҳам чиқиши мумкинми?

— Шубҳасиз, улар учун мусобақага чиқишнинг ўзи катта муваффақият. Бироқ ҳозирги форматда ҳатто гуруҳда учинчи ўринни олган жамоа ҳам кейинги босқичга чиқиши мумкин. Шу боис, гарчи Ўзбекистон мен учун Португалия ва Колумбия билан «ўлим гуруҳи»да бўлса-да (Колумбияни жуда юқори баҳолайман), менимча, улар турнирнинг «қора оти» бўлиши мумкин. Конго ДР терма жамоаси ҳам улардан даражаси бўйича унчалик фарқ қилади деб ўйламайман. Яқинда Ўзбекистон терма жамоасининг ўйинига боргандим, йигитлар менга ёқди, Шомуродов жуда яхши ўйнади. Улар — ўйнайдиган жамоа.

— Абдуқодир Ҳусанов умуман олганда бу мавсумда «Манчестер Сити»нинг энг яхши уч нафар футболчиси сафига кирди. Бу ақлбовар қилмас ютуқ.

— Бу мен учун, албатта, янгилик бўлди. Ҳусанов «Ман Сити»га ўтмагунича, у кимлигини билмасдим. Унинг у ерда ўйнаб кетишига нисбатан шубҳа билан қарагандим, лекин у жуда зўр ўйнамоқда, бунга нима ҳам дейиш мумкин...

— Уни катта футболчи қилиб Гвардиола «ясади»ми?

— Менимча, у ўзини ўзи «ясаган». Лекин у Гвардиоланинг талабларига мос келгани ва мураббий унга ишонганида Пепнинг ҳам ҳиссаси бор, деб ўйлайман. Шунга қарамай, Ҳусанов ўзини ўзи кашф қилган, деб ҳисоблайман.

Эслатиб ўтамиз, 2026 йилги Жаҳон чемпионатида Ўзбекистон терма жамоаси «K» гуруҳида Португалия, Конго ДР ва Колумбия билан куч синашади.