Мадриднинг «Реал» клуби президентлигига номзод Энрике Рикельме Микель Артетани жамоага олиб келишни ният қилган. Флорентино Переснинг сайловолди кампаниясидаги ягона рақиби бўлган ушбу шахс, тезкор натижа беришга тайёр бўлган номдор мураббий билан аллақачон келишиб қўйганини даъво қилган эди.
Okdiario нашрининг хабар беришича, 37 ёшли тадбиркор айнан Артетага шаъма қилган. «Канонирлар» устози билан музокаралар аллақачон ўтказилган ва у розилик жавобини берган. Агар ушбу маълумот ҳақиқат бўлса, тайинлов Рикельме 7 июнь куни бўлиб ўтадиган сайловларда ғалаба қозонган тақдирда амалга оширилади.
Шанба куни Микель Артета қўл остидаги «Арсенал» Чемпионлар лигаси финалида «ПСЖ»га ўйиндан кейинги пенальтилар сериясида имкониятни бой берган эди.
