«Манчестер Сити» ярим ҳимоячиси Родри ўз келажаги борасидаги қарорни 2026 йилги Жаҳон чемпионати якунига қадар кечиктирди. Бу ҳақда футболчи Испания терма жамоаси матбуот анжуманида маълум қилди.
Мадриднинг «Реал» клуби унга қизиқиш билдираётгани ҳақидаги миш-мишлар фонида 29 ёшли футболчи ҳозир бор эътиборини терма жамоадаги ўйинларга қаратганини айтди. Родрининг инглиз клуби билан тузган шартномаси бир йилдан сўнг ўз ниҳоясига етади.
«Биз бу ерга Жаҳон чемпионати ҳақида гаплашиш учун келдик. Келажагимга дахлдор барча нарса турнир якунигача кутиб туради», — деди ярим ҳимоячи.
Аввалроқ Мадриднинг «Реал» клуби президентлигига номзод Энрике Рикельме Родрини клубнинг асосий трансфер мақсадларидан бири сифатида тилга олган эди. Футболчининг ўзи ҳам баҳорда ватанига қайтиш эҳтимолини инкор этмаганди.
«Ҳа, мен Испанияга қайтишни хоҳлардим. Ла Лига — мен фаолиятимни бошлаган жой», — деган эди ўшанда Родри.
Родри 2019 йилдан бери «Манчестер Сити» сафида тўп суради. Бу вақт ичида у тўрт марта Англия чемпионатида ғолиб чиқди, Чемпионлар лигаси ва «Олтин тўп» соҳибига айланди.
