«Manchester Siti» yarim himoyachisi Rodri o‘z kelajagi borasidagi qarorni 2026 yilgi Jahon chempionati yakuniga qadar kechiktirdi. Bu haqda futbolchi Ispaniya terma jamoasi matbuot anjumanida ma’lum qildi.

Madridning «Real» klubi unga qiziqish bildirayotgani haqidagi mish-mishlar fonida 29 yoshli futbolchi hozir bor e’tiborini terma jamoadagi o‘yinlarga qaratganini aytdi. Rodrining ingliz klubi bilan tuzgan shartnomasi bir yildan so‘ng o‘z nihoyasiga yetadi.

«Biz bu yerga Jahon chempionati haqida gaplashish uchun keldik. Kelajagimga daxldor barcha narsa turnir yakunigacha kutib turadi», — dedi yarim himoyachi.

Avvalroq Madridning «Real» klubi prezidentligiga nomzod Enrike Rikelme Rodrini klubning asosiy transfer maqsadlaridan biri sifatida tilga olgan edi. Futbolchining o‘zi ham bahorda vataniga qaytish ehtimolini inkor etmagandi.

«Ha, men Ispaniyaga qaytishni xohlardim. La Liga — men faoliyatimni boshlagan joy», — degan edi o‘shanda Rodri.

Rodri 2019 yildan beri «Manchester Siti» safida to‘p suradi. Bu vaqt ichida u to‘rt marta Angliya chempionatida g‘olib chiqdi, Chempionlar ligasi va «Oltin to‘p» sohibiga aylandi.