Испаниялик мутахассис Андони Ираола «Ливерпуль» бош мураббийи лавозимига тайинланганига изоҳ берди.

«Қизиллар» 43 ёшли мутахассис жамоага келиб қўшилганини пайшанба, 4 июнь куни эълон қилишди. Ираола «Ливерпуль»да Арне Слотнинг ўрнини эгаллади.

«Мен жуда ҳаяжондаман. Сиз «Ливерпуль»ни яхши биласиз, унинг улкан клуб, дунёдаги энг буюклардан бири эканлигидан хабардорсиз. Бу клуб сизни ўзига жалб қилиши учун кўп сабаблар қидириш шарт эмас. «Ливерпуль» — бу «Ливерпуль». Муҳит, мухлислар, клуб, топ-футболчиларга мураббийлик қилиш ва совринлар учун курашиш имконияти — менимча, бундан жозибалироқ ҳеч нарса бўлиши мумкин эмас. Бунга ўхшашини топиш қийин. Шу бош сабабли иш бошлашни интиқлик билан кутяпман», — дея Ираоланинг сўзларини келтиради «Ливерпуль» матбуот хизмати.

Ираоланинг сўнгги иш жойи «Борнмут» клуби бўлиб, у ерни 2025/26 йилги мавсум якунида тарк этган эди. У шунингдек, Испаниянинг «Райо Вальекано», «Мирандес» ва Кипрнинг АЕК клубларини ҳам бошқарган.