Франкфуртнинг «Айнтрахт» клуби ва Германия терма жамоаси чап қанот ҳимоячиси Натаниэль Браун «Бавария» билан тахмин қилинаётган келишув ҳақидаги хабарларга муносабат билдирди. Германия ОАВларининг маълумотларига ишонадиган бўлсак, 22 ёшли футболчи Мюнхен клубига ўтишга розилик берган.
«Мен бутун эътиборимни Жаҳон чемпионатига қаратганман, шу сабабли ҳозир бу ҳақда гапирмайман. Терма жамоа ихтиёрида эканлигимдан хурсандман. Яна бир бор такрорлайман, ҳозир барча фикру хаёлим Жаҳон чемпионати ва унга кўриладиган тайёргарлик билан банд», — дея Брауннинг сўзларини Bayern & Germany нашри келтирмоқда.
Якунланган мавсумда футболчи «Айнтрахт» сафида барча турнирларда 42 та ўйинда майдонга тушиб, 4 та гол урди ва 6 та голли узатмани амалга оширди.
