Эрон миллий терма жамоаси учун Жаҳон чемпионати — 2026 олдидан расмий кузатиш маросими бўлиб ўтди. Euronews нашрининг хабар беришича, тадбир Теҳронда ташкил этилган ва унда жуда кўп сонли мухлислар жам бўлган.

Маросим давомида миллий терма жамоанинг жаҳон биринчилиги учун мўлжалланган янги либоси (формаси) тақдимот қилинди. Шунингдек, тадбирда антиамерикача шиорлар ҳам янгради.

Бундан олдинроқ, Эрон терма жамоаси жаҳон чемпионатининг гуруҳ босқичидаги барча ўйинларини ўтказадиган АҚШга кириш учун виза олишга муваффақ бўлгани ҳақида хабарлар берилган эди.

Эслатиб ўтамиз, эронликлар мундиалда Бельгия, Миср ва Янги Зеландия терма жамоалари билан бир гуруҳдан жой олган. Бир йўла учта мамлакат мезбонлик қиладиган ушбу турнир келаси ҳафтада старт олади.